ҚР Білім және ғылым министрі Асхат Аймағамбетовпен жүздескен Ел Президенті Қасым-Жомарт Тоқаев «Білімді Ұлт» ұлттық жобасын дайындау аясында еліміздің білім беру жүйесін әлемнің жетекші университеттерінде білім алған кадрларымызбен нығайту жөнінде мәселе көтерген еді. Бүгінгі жазбам осындай мықты кадрлардың бірі – әріптесіміз, тарих ғылымдарының кандидаты, Қазақ инновациялық гуманитарлық заң университетінің гуманитарлық факультетін басқарған, қазірде университеттің Тарих және әлеуметтік гуманитарлық ғылымдар кафедрасының қызметкері, еліміздің жоғарғы білім саласына аянбай еңбек сіңіріп жүрген азамат - Мамырбеков Арафат Мәжитұлы туралы.
Бұған дейін «Болашақ» бағдарламасы аясында АҚШ-та, әлемге әйгілі Макс Планк Институты стипендиясы аясында Германияда, «Атлас» бағдарламасы аясында Францияда, одан өзге ондаған гранттық бағдарламалар аясында әлемнің жетекші оқу орындары мен зерттеу орталықтарында білімін жетілдірген, кәсіби тағылымдамадан өткен, зерттеулер жүргізген Арафат Мәжитұлы бұл күндері ғылым жолындағы ізденістерін одан ары жалғастыру мақсатында Канадаға жол тартты. Әлемдегі жетекші университеттердің бірі –Калгари Университетіне антропология саласы бойынша төрт жылдық докторантураға университет гранты есебінен оқуға түсті. Бұдан бөлек, жыл сайын әлемдегі ең үздік 5 ғалымға ғана берілетін Веннер-Грен қорының (АҚШ) зерттеу жұмысын жүргізуге беретін грантының иегері атанды.
Бүгін мен Арафат Мәжитұлына өз атымнан, Қазақ инновациялық гуманитарлық заң университетінің еңбек ұжымы, профессорлық-оқытушылық құрамы мен білім алушыларының атынан ақ жол тілемін! Білім-ғылым жолындағы тоқтаусыз ізденістеріне сәттілік тілеймін! Канада еліндегі ғылыми зерттеу ісіне толағай табыс, қажымас қайрат, талмас қанат тілеймін!
Мұхиттың арғы бетінен теңдессіз тәжірибе жинақтап, елімізге аман есен оралуын тілей отырып, жиған-терген білімі мен кәсіби білігін одан ары Еліміздің дамуына, білім беру саласының қарыштап дамуына сіңіреді деген сенімдемін! Ақ жол, Арафат Мәжитұлы! Білімді Ұлт сіздей азаматтардың еңбегінің арқасында қалыптасуда!
